अखिल भारतीय भोजपुरी साहित्य सम्मेलन के प्रवर समिति व राष्ट्रीय कार्यकारिणी की संयुक्त बैठक राँची में हुई
श्रीनारद मीडिया सेंट्रल डेस्क
झारखंड में राँची नानकुम के अखिल भारतीय भोजपुरी साहित्य सम्मेलन के प्रवर समिति आ राष्ट्रीय कार्यकारिणी के संयुक्त बइठक प्रवर समिति के सम्मानित सदस्य आचार्य हरेराम त्रिपाठी चेतन जी के अध्यक्षता आ महामंत्री प्रो. जयकान्त सिंह ‘ जय ‘ के संचालन में सम्पन्न भइल। एकरा में अगिला अधिवेशन खातिर बिहार आ झारखंड के ओर से दूगो मौखिक नेवता मिलल।
जवना पर पन्द्रह फरवरी, २०२५ के बाद निर्णय लिहल जाई। एह अवसर पर चेतन जी के पुस्तक ‘ कस्तुरी गंध ‘ कनक किशोर जी के पत्रिका ‘ जोहार भोजपुरी माटी : किसान अंक ‘ आ भोजपुरी सम्मेलन पत्रिका के नवका दू अंकन के लोकार्पण भइल। छत्तीसगढ़, झारखंड आ बिहार के कई गो भोजपुरी प्रेमी सम्मेलन के विशिष्ट आजीवन सदस्य, आजीवन सदस्य, वार्षिक सदस्य आ पत्रिका के आजीवन आ वार्षिक सदस्य बनलें।
पत्रिका के रामेश्वर सिंह काश्यप आ डा. जितराम पाठक विशेषांक के अलावे पहिले से सम्मेलन पत्रिका में अबतक छपल आलोचनात्मक आ शोधपरक आलेखन के संकलित अंक आदि निकाले पर विचार भइल। एकरा अलावे भोजपुरी शिक्षा, अकादमी के वर्तमान व्यवस्था , पटना में भोजपुरी भवन आदि के दिसाईं कई गो प्रस्ताव पारित भइल।
बइठक वीणा पाण्डेय जी के मंगलाचरण, कनक किशोर जी के स्वागत भाषण आ अंकूश्री जी के धन्यवाद ज्ञापन के बीच डॉ. महामाया प्रसाद विनोद जी ( कार्यकारी अध्यक्ष ), प्रसेनजीत तिवारी जी ( सदस्य, प्रवर समिति ), अजय ओझा जी ( उपाध्यक्ष ), जितेन्द्र कुमार जी ( कोषाध्यक्ष ), दिलीप कुमार जी (कार्यालय मंत्री ), उदय नारायण सिंह जी ( कला संस्कृति ), शिवानुग्रह नारायण सिंह जी ( मीडिया ), माधवी पाण्डेय जी, अरविन्द श्रीवास्तव जी, विनोद कुमार सिन्हा जी आदि के उद्बोधन – सम्बोधन से बइठक में कई गो विचारणीय प्रस्ताव पारित हो सकल।
